Шу кунларда мамлакатимиз бўйлаб Ўзбекистон Республикаси Маданият ва спорт ишлари вазирлиги ташаббуси билан «Куйла, ёшлигим!» деб номланган эстрада қўшиқчилиги танлови ўтказилмоқда. Бундан мақсад, ёш талантларни излаш, уларнинг истеъдодларини намоён қилишдан иборатдир.
Бу нуфузли танловнинг туман босқичи 20 апрель куни Қўқимбой маданият ва аҳоли дам олиш марказида бўлиб ўтади. Танловни уюшқоқлик билан намунали ўтказишга қаратилган тайёргарлик ишлари поёнига етказилди. Айни дамда ёш талантларни танловга жалб этиш учун тарғибот ва ташқивот ишлари олиб борилмоқда.
Республика мактаб ўқувчиларининг «Умид ниҳоллари» спорт мусобақаси дастуридан ўрин олган таэквандонинг WIF йўналиши бўйича вилоят босқичи баҳслари бўлиб ўтди.
Унда туманимиздаги болалар ва ўсмирлар спорт мактабининг ўнга яқин тарбияланувчилари муносиб қатнашдилар. Кўплаб нуфузли мусобақаларда фахрли ўринларни эгаллаган мураббий Мафтуна Абдуҳакимованинг шогирдлари бу гал ҳам ижобий натижаларга эришишди. Жумладан, Бобур Каримов ўз вазн тоифасида фахрли биринчи ўринни банд этган бўлса, Асадбек Ғафуров, Моҳира Абдухалилова, Жаҳонгир Акбаралиев, Ойбек Абдураҳмонов, Машҳура Тўхтахўжаева, Сарварбек Баҳодиров шоҳсупанинг иккинчи ва учинчи поғоналаридан жой олишди.
Мактабимизда 1 «б»-синф ўқувчиларининг «Саводхонлик байрами» ўтказилди. Тадбирга ота-оналар, ўқитувчи ва тарбиячилар таклиф қилинди.
Мусиқа садолари остида мактаб майдончасига кириб келган жажжи ўғил-қизлар шеърлар айтишди, қувноқ қўшиқлар ва рақслар ижро этишди. Бу бошланғич синф ўқитувчиси Маҳфуза Абдуллажонова, тарбиячи Шаҳноза Мажидованинг шарафли ва машаққатли меҳнати самарасидир.
«Соғлом она ва бола йили»да ўтказилган бу тадбир ҳар йилгидан кўра мазмун-моҳияти билан ўзгача ўтди. «Озодалик, тозалик - шудир гўзаллик» мавзусидаги кенгайтирилган саҳна кўриниши диққатга сазовор бўлди.
Наманган шаҳридаги 1-мусиқа ва санъат мактабида Мухтор Ашрафий номидаги академик чолғулар ва эстрада ижрочилиги республика кўрик-танловининг вилоят босқичи бўлиб ўтди. Унда туманимиздаги 3-сон болалар мусиқа ва санъат мактаби ўқувчилари ҳам муносиб иштирок этиб, ижобий натижаларга эришишди. Жумладан, эстрада хонандалиги бўйича 5-синф ўқувчиси Дурдона Юсуфалиева фахрли 3-ўрин, фортепиано йўналиши бўйича 4-синф ўқувчиси Лола Жўраева фахрли 3-ўрин, эстрада хонандалиги бўйича иштирок этган 3-синф ўқувчиси Муҳаммадабдулло Сотиволдиев фахрий ёрлиқ билан тақдирланди.
«Камолот» ЁИҲ туман кенгаши, касб-ҳунар коллежлари, 8-Обод, 9-Ободон чегара постлари, «Маҳалла» хайрия жамоат фонди, туман маданият ва спорт ишлари бўлими ва МК «Ватанпарвар» ташкилоти туман кенгаши ҳамкорлигида тумандаги коллежлар ўқувчилари ўртасида ўқувчи-ёшларнинг хизматни ўташ, ҳарбий билим юртларига ўқишга кириши учун руҳан ва жисмонан тайёрлаш, улар ўртасида Ватанга муҳаббат, ҳарбий ватанпарварлик ғояларини тарғиб қилиш, ёш авлодга давлат чегаралари дахлсизлиги, Ватанимиз хавфсизлигини таъминлашда уларнинг масъулиятини янада кучайтириш мақсадида ташкил этилган «Ёш чегарачилар» ҳарбий-ватанпарварлик мусобақасининг туман босқичи Косонсой педагогика ва сервис коллежида бўлиб ўтди. Унда тумандаги Қўқимбой қишлоқ хўжалиги коллежининг «Жасорат», Косонсой педагогика ва сервис коллежининг «Кушон» жамоалари ҳамда НамМТИ қошидаги 2-сон академик лицейининг «Ҳумо» жамоалари беллашдилар.
Фарғона вилоятининг Қувасой шаҳрида кикбоксинг бўйича ёшлар ва ўсмирлар ўртасида мамлакат биринчилиги бўлиб ўтди.
Ушбу нуфузли мусобақада вилоятимиз шарафини туманимиздаги 5, 18,14-мактаблар ўқувчилари Авазхўжа Мубаширхонов, Жамшид Абдусатторов, Ойбек Отамирзаевлар муносиб ҳимоя қилишди.
Ўз вазн тоифаларида шоҳсупанинг учта поғонасини банд этган ёш спортчиларимиз устозлари Ёқубхон Порсихоновнинг ишончини оқлашга муяссар бўлишди.
Қўқимбой қишлоғидаги марказий ўйингоҳда маҳаллалар ёшлари ўртасида спортнинг футбол тури бўйича қишлоқ биринчилиги ўтказилди. Унда ёшлар ва ўсмирлардан таркиб топган 14 та жамоа ғолиблик учун кураш олиб борди.
Мусобақа финалида 1985 йилда туғилганлар 1994 йилда туғилган ёшларга қарши майдонга тушишди. Кескин курашлар остида ўтган ўйиннинг қўшимча вақтида битта гол эвазига (умумий ҳисоб 2:1) 1985 йилда туғилганлар жамоаси ғолибликни қўлга киритишди.
Наманган шаҳрида «Камолот шахмат тахтаси» спорт мусобақасининг вилоят босқичи бўлиб ўтди.
Унда 16-мактабдан 4 нафар, 25,28,44-мактаблардан 1 нафардан ёш шахматчилар туманимиз шарафини ҳимоя қилишди.
Мусобақа якунига кўра, 16-мактаб ёш шахматчилари-Оқилбек Ҳомидов ва Дурдона Эгамбердиева чемпион бўлиб, республика босқичи йўлланмасини қўлга киритишди.
Тоштилло Абдураҳмонова, Гулбаҳор Сотиволдиева эса совриндорлар қаторидан жой олишди.
Косонсой маиший хизмат касб-ҳунар коллежида ёш ўт ўчирувчилар спорт мусобақасининг туман босқичи бўлиб ўтди.
Тумандаги коллежлар ўқувчиларидан таркиб топган ҳаваскор ёш ўт ўчирувчилар жамоалари 100-1000 метрга югуриш, турник тортиш каби спорт ўйинлари, тест саволларига жавоб қайтариб, билим ва маҳоратларини синовдан ўтказдилар.
Умумжамоа бўйича фахрли ўринларни педагогика сервис, маиший хизмат ва Тергачи қурилиш коллежлари ёш ўт ўчирувчилари банд этишди.
Наманган шаҳридаги «Баркамол авлод» болалар ва ўсмирлар спорт мактаби залида Республика оилавий спорт мусобақасининг вилоят босқичи бўлиб ўтди.
«Соғлом оила» шиори остида ўтказилаётган мусобақанинг бу босқичида ўғли билан қатнашган спортсевар оилалар баҳсида туманимиздаги 28-мактаб ўқитувчиси Ғолибжон Шариповлар оиласи фахрли учинчи ўрин соҳиби бўлди.
Қизи билан белашувларда туманимиз вакили 8-мактаб ўқитувчиси Ғайрат Исомиддиновлар оиласи мутлақ ғолибликни қўлга қиритиб, мусобақанинг мамлакат босқичи йўлланмасини қўлга киритди.
Мозийга бир назар
Фойдали ҳаволалар
