Яқинда Тошкентдан хушхабар келди. Пойтахтимиздаги Олимпия захиралари коллежи спорт саройида бўлиб ўтган енгил атлетика бўйича республика чемпионатида ҳамшаҳримиз, 22-ДИМИ жисмоний тарбия ўқитувчиси Пўлатжон Устабоев мамлакат чемпиони, деган шарафли номга сазовор бўлди.
Ўттиз бешдан қирқ беш ёшгача бўлган спортчилар ўртасидаги 60 метрлик масофага югуришда Пўлатжон 7 дақиқаю, 94 сония натижасини қайд этиб, кумуш медални қўлга киритган бўлса, узунликка сакрашда мутлақ ғолиб бўлиб, Ўзбекистон чемпиони бўлди.
Туманимизда қисқа вақт ичида 51 та, шундан 17 таси сунъий қопламали футбол майдонлари ташкил этилиб, фаолият олиб бормоқда.
Яқинда Марказий ўйингоҳда «Спорт менинг фахримдир» шиори остида ўтказилган мини-футбол мусобақасида маҳаллалардаги ўсмир ёшлардан иборат 15 та жамоа қатнашди.
Кескин курашларга бой ўтган баҳслар якунига кўра фахрли ўринларни Чўнгбош, «Олмазор» ва М. Аъзам номли маҳаллалар ўсмир-ёшлари эгаллашди.
Халқаро хотин-қизлар куни муносабати билан МК «Ватанпарвар» ташкилоти туман кенгашида раҳбар аёллар ўртасида спортнинг «Ҳаво милтиғида ўқ отиш» тури бўйича туман ҳокимининг соврини учун мусобақа ўтазилди.
Мусобақа 3-турда, яъни 25-34,35-45 ёшлилар, 46 ёш ва ундан катталар ўртасида бўлиб ўтди.
Биринчи турда фахрли ўринларни 36-мактабгача таълим муассасаси мудираси Шоҳида Бобоева, 33-мактабгача таълим муассасаси тарбиячиси Манзура Каримова, 28-мактабгача таълим муассасаси мудираси Нодира Аҳмедова эгаллашди.
Касб-ҳунар коллежларида таҳсил олаётган иқтидорли қизлар ва уюшмаган ёшлардан иборат жамоаларнинг миллийликка уйғунлашган замонавий кийимлар тақдимоти «Ватан ҳимоячилари куни» байрамига муносиб совға бўлди.
Маҳаллаларда яшовчи уй бекалари, фаол аёллар, ҳарбийда намунали хизмат қилаётган аскарларнинг оналари, касб-ҳунар коллежлари хотин-қизлар етакчилари, туман маданият ва спорт ишлари бўлими, тадбиркор аёллар қатнашган байрам тадбирида қизлар наинки миллий либосларни намойиш этишди, балки аскар йигитларга бағишлаб шеърлар ўқишди, байрам табриклари йўллашди. Айниқса, «оммавий маданият»нинг салбий жиҳатлари фош этилган саҳна кўринишлари барчага манзур бўлди.
Туманимиздаги 3-сонли болалар мусиқа ва санъати мактаби ўзбек халқ чолғу асбоблари бўлими ёш ижрочилари ҳисобот концерт беришди.
Мактаб устоз ва ўқувчилари, ота-оналар иштирокида ўтказилган ҳисобот- концертида Қашқар рубоби синфи ўқитувчиси, Ўзбекистон Республикаси халқ таълими аълочиси Абдурауф Раҳимов шогирдларининг чиқишлари барчанинг эътиборини тортди. Айниқса, М. Мақсудов, М. Қаҳҳоров, Н. Абдумаликов, Б. Худойбердиев, М. Қаҳҳоров, Р. Икромжонов каби ёш талантлар ўзбек халқ мумтоз қўшиқ ва куйларини маромига етказиб ижро этиб, олқиш олишди.
Қўқимбой озиқ-овқат касб-ҳунар коллежи спорт залида вояга етмаган ёшлар ўртасида спортнинг дзю-до тури бўйича вилоят чемпионати бўлиб ўтди.
«Кексаларни эъзозлаш йили»га бағишлаб ўтказилган мусобақада 8 ёшдан 14 ёшгача бўлган болалардан таркиб топган 25 та жамоа қатнашди.
Кескин баҳсларга бой бўлган мусобақа якунига кўра, фахрли биринчи ўринни Наманган олимпия захиралари коллежи ёш полвонлари эгаллашди.
Иккинчи ва учинчи ўринлар «Баркамол авлод» спорт маркази ҳамда заркентлик спортчиларга насиб этди.
Олдин хабар берганимиздек, жорий йилнинг 19-22 октябрь кунлари Озарбайжоннинг Боку шаҳрида VII Халқаро ёш ижрочиларнинг «Муғом» кўрик-танлови бўлиб ўтди.
Дунёнинг йигирматадан ортиқ давлат вакиллари иштирок этган ушбу танловда юртимиз шарафини туманимиздаги 3-болалар мусиқа ва санъат мактаби ўқувчилари Толибжон Тўхтасинов ва Гулзода Ҳусанбоева муносиб ҳимоя қилишди.
14-болалар ва ўсмирлар спорт мактабининг тажрибали мураббийи Мафтуна Абдуҳакимова қўл остида шарқ якка кураши сир-асрорларини пухта эгаллаётган ўқувчи- ёшлар турли турнирларда муваффақиятли иштирок этишмоқда. Яқинда Фарғона вилояти очиқ чемпионатида ҳам Мафтунанинг шогирдлари зафар қучишди. Жумладан, таэквондо WTF баҳсида қатнашган Мумтозбегим Халилова 29 кг. вазн тоифасида олтин медални қўлга киритган бўлса, Камола Насимова, Дилноза Нажмиддинова (26, 37 кг. вазн тоифасида) кумуш медаллар соҳиби бўлишди.
Шу йил 25-31 август кунлари марказий ўйингоҳ ҳудудидаги сунъий қопламали майдончаларда «Кексаларни эъзозлаш йили» ва Ўзбекистон Республикаси мустақилигининг 24 йиллигига бағишлаб «Бетакроримсан, ягонасан она Ватаним-Ўзбекистоним!» шиори остида уюшмаган ёшлар ўртасида маҳаллалараро мини футбол мусобакаси ўтказилди. Унда тумандаги ҳар бир ҚФЙлардан биттадан, шаҳар маҳаллаларидан тўртта, жами 14та жамоа ғолиблик учун майдонга тушди. Қизғин кечган баҳслар якунига кўра фахрли 1-ўринни Чорбоғ, 2-ўринни Ободон, 3-ўринни Обод маҳаллалари ва 4-ўринни Гулобод маҳалласи жамоалари эгаллашди.
«Чўнгбош», «Такаранг», «Обод-2», «Ёшлик» ва «Юмалоқшайхмозор» МФЙ футболчилари ҳам чиройли ўйинлари билан томошабинлар олқишларига сазовор бўлишди.
Яқинда Тошкент вилоятининг Янгийўл туманида «Кексаларни эъзозлаш йили» ва Мустақиллигимизнинг 24 йиллигига бағишлаб фахрийлар ўртасида футбол турнири ташкил этилди.
Унда Тошкент шаҳри ва вилоятининг тўртта, Наманган вилоятининг «Навқирон» фахрийлар жамоалари иштирок этишди.
Вилоятимизнинг «Навқирон» фахрийлар футбол жамоаси таркибида нафақат собиқ футболчилар, балки турли касб эгалари, зиёлилар, тадбиркорлар ҳам бор. Ҳаваскор фахрий футболчилар бундай катта-кичик турнирларда фаол иштирок этиб келишмоқда. Шуниси эътиборлики, жамоа таркибининг асосини фахрийлар ўртасида вилоят чемпиони бўлган туманимиз фахрийлар жамоаси аъзолари ташкил этишади. Жумладан, ушбу турнирда ҳам дарвозабон Аҳмадхон Эшонхўжаев, ярим ҳимоячи ва ҳужумчилар- Ҳамидхон Муйдинхўжаев, Алишер Раҳимов, Нўъмонжон Икромовлар вилоятимиз шарафини муносиб ҳимоя қилишди.
Мозийга бир назар
Фойдали ҳаволалар
