Ёшларнинг ўз маҳаллаларини ривожлантиришдаги ташаббускорлигини янада ошириш, маҳаллаларда илғор тажрибаларни оммалаштириш каби вазифаларни бажаришда «Маҳалла-менинг тақдиримда» кўрик-танловининг аҳамияти беқиёсдир.
Яқинда ана шу танловнинг туман босқичи ўтказилди. 4-БМСМ залида ўтказилган тадбирда барча маҳаллаларнинг ёшлар вакиллари фаол иштирок этдилар. Айниқса, «Ёшлик» МФЙнинг «Ёш авлод», «Навбаҳор» МФЙнинг «Баҳор», С. Шерозий МФЙнинг «Учқун» жамоаларининг чиқишлари танлов ҳайъати томонидан юқори баҳоланди.
Яқинда Грузиянинг Ботуми шаҳрида Шарқ якка курашининг шотокан каратэ-До тури бўйича Жаҳон кубоги мусобақаси бўлиб ўтди.
Дунёнинг етмишдан ортиқ давлати спортчилари иштирок этган бу нуфузли мусобақада юртимиз ёшлари ҳам муносиб қатнашиб, Ўзбекистон ёшлари ҳеч кимдан кам эмаслигини амалда яна бир бор исботлашди.
Бу мусобақа, ҳамюртимиз, «Ўзбекистон белгиси» кўкрак нишони соҳиби, 5 карра жаҳон чемпиони ва 2 карра Жаҳон кубоги нишондори Муҳаммадсиддиқ Абдумуталов учун энг олий орзуси-Олимпиада ўйинларида ғолиблик шоҳсупасини эгаллаши йўлидаги яна бир синов бўлди. 1996 йилда таваллуд топган ёш спортчи аксарият рақибларидан устун келиб, 2 та кумуш, 2 та бронза медалларини қўлга киритди.
Биринчи Президентимиз орзу қилганидек, азиз ёшларимиз, бугун бизнинг давримиз келди, Ўзбекистоннинг замони келди, дунё бизни тан олаяпти, деган ғурур ва ифтихор билан яшаб, янги-янги марраларни забт этишяпти.
Айниқса, уларнинг спортдаги ютуқлари - гўзал ва бетакрор Ватанимизга меҳр қўйиб, фахр билан яшашга ундамоқда.
Шаҳзоджон Абдураҳмонов 6-мактабнинг аълочи, жамоат ишларида фаол ўқувчиларидан бири. У бўш пайтларида спорт билан мунтазам шуғулланиб келади. Ўзбек жанг санъатига меҳр қўйган Шаҳзоджон бу спорт тури сир-асрорларини пухта эгаллаш мақсадида Наманган шаҳридаги спорт мажмуасига қатнашга вақт топаяпти.
Устозлари ўгитларига амал қилиб, машғулотларда ўзини кўрсатган Ш. Абдураҳмонов яқинда вилоят терма жамоасига қабул қилинди ва спортдаги фаолияти давомида илк марта нуфузли мусобақа - Ўзбекистон чемпионатида иштирок этишга муяссар бўлди.
Ўзбекистон касаба уюшмалари федерацияси кенгаши ташаббуси билан ташкил этилган анъанавий «Истиқлол ғунчалари» кўрик-танловининг вилоят босқичи бўлиб ўтди. Унда иштирок этган туманимиз ёш бадиий ҳаваскорлари Азимжон Исломов ва Равшанжон Икромжонов фахрли ўринларни эгаллаб, танловнинг республика босқичи йўлланмасини қўлга киритишди.
Касаба уюшмалари федерацияси кенгаши томонидан ўтказилаётган ушбу тадбир ёш авлодни бадиий ҳаваскорлик ва санъатга жалб этиш орқали уларда Ватанга муҳаббат, миллий ва маданий анъаналарга ҳурмат руҳида тарбиялашда аҳамияти беқиёсдир. Бу йилги танловда маданият муассасалари, маданият ва аҳоли дам олиш масканлари қошидаги бадиий тўгараклар аъзолари бўлган ёш истеъдод эгалари иштирок этишди.
-Танловнинг туман босқичида 78 нафардан ортиқ ёш талантлар қатнашишди,-дейди ёшлар устози Абдурауф Раҳимов.-Хусусан, мен раҳбарлигимдаги анъанавий ижрочилик тўгараги аъзолари катта муваффақият қозонишди. А. Исломов, Р. Икромжонов якуний босқич йўлланмасини қўлга киритган бўлишса, якка ижрочилик ва эстрада йўналишида Саодат Аъзамова ва Одина Чўлпонова вилоят босқичида фахрли ўринларни банд этишди.
«Эртанги кун ёшлар қўлида, ёшлар ҳаракатида, ёшлар илмида, керак бўлса қудратида». Биринчи Президентимизнинг бу доно ўгитлари ижобати туфайли ҳам мустақил юртимизда ёшларга эътибор олий мақсадга айланди. Бундай ўз фарзандларининг жисмоний, интеллектуал ва маънавий етук бўлишини олий мақсад деб билган мамлакат юксак тараққиётга эришиши муқаррар.
Яратиб берилган кенг имкониятлар, қулай шарт-шароитлар ёшларимизнинг янги-янги ютуқларни қўлга киритишига замин бўлмоқда.
Бизнинг мусиқа мактабимизда истеъдодли ёшлар кўпчиликни ташкил этади. Улардан Муҳаммадабдулло Сотволдиев ва Олимахон Тожибоева эришаётган ютуқлар Ўзбекистон ёшлари ҳеч кимдан кам эмаслигини амалдаги исботидир. Бунга яқинда Озарбайжон Республикасининг Боку шаҳрида бўлиб ўтган халқаро фестивалда уларнинг муваффақиятли иштироки мисол бўла олади.
Бу икки ёш истеъдод соҳиби «Муғом» деб номланган халқаро танловда «Рост» мақомидан «Соқиномаи савти калон» ва озарбайжонча муғом ашулаларини маромига етказиб ижро этиб, фахрли 3-ўринни эгаллашди.
Яқинда Жанубий Кореянинг Гёнгжу шаҳрида таэквандонинг WTF таснифида «Кorea open» халқаро турнири бўлиб ўтди.
Унда Ўзбекистон терма жамоаси таркибида туманимиздаги 16-мактаб ўқувчилари Мумтозбегим Халилова ва Асадбек Ғофуров муносиб қатнашишди. Ушбу нуфузли турнирда Мумтозбегим бронза медали соҳиби бўлди. Асадбекка эса мусобақада фаол қатнашганлиги учун сертификат берилди. Ҳозирда бу икки ёш спортчи сентябрь ойида Малайзиянинг Куала-Лумпур шаҳрида бўлиб ўтадиган «Malayzia open» халқаро турнирига қизғин ҳозирлик кўрмоқда.
Истиқлол йилларида юртимизда болалар спорти ривожига таълим-тарбия соҳасининг ривожи сифатида эътибор кучайтирилмоқда. Бундан кўзланган мақсад, дунёда ҳеч кимдан кам бўлмайдиган соғлом ва баркамол авлодни тарбиялашдир.
Дилмурод ёзги таътилни мароқли ва сермазмун ўтказмоқда. Ота-онасига уй ишларида ёрдамини аямайди, бўш пайтларида эса Марказий ўйингоҳдаги футбол тўгарагига ошиқади.
5-мактабнинг 6-синф ўқувчиси Дилмурод Йўлдошев келажакда етук футболчи бўлишни орзу қилади ва ана шу орзуси йўлида машғулотларни канда қилмаяпти.
-Болаларни спорт билан шуғулланишларига етарли шароитлар яратилган,-дейди Д. Йўлдошев.- Мен ҳам тенгқурларим қатори футбол тўгарагига қатнаб, бу спорт турининг сир-асрорларини пухта ўрганаяпман. Келажакда Миржалол Қосимов, Одил Аҳмедов сингари етук футболчи бўлмоқчиман.
Куни кеча Фарғона шаҳрида «Юлдузча» телевизион кўрик-танловининг ҳудудий босқичи бўлиб ўтди. Унда туманимиздаги 3-БМСМ ўқувчилари Толибжон Тўхтасинов, Дурдона Юсуфалиева ва Олимахон Тожибоева иштирок этишди.
Бу уч нафар ёш истеъдод эгаси анъанавий, эстрада, академик хонандалик йўналишлари бўйича танлов ғолиби бўлиб, республика босқичи йўлланмасини қўлга киритишди.
-Ўзбекистон-биз учун ягона ва буюк Ватан! Она-Ватанга муҳаббатимизни қўшиқларимизда ифода этамиз,-дейди 3-БМСМ қошидаги «Хушнаво-2» болалар бадиий жамоаси аъзоси М. Сотиволдиев.
Болалар мусиқа ва санъат мактаби қошидаги бадиий жамоа аъзолари яқинда Андижон шаҳрида ўтказилган «Ягонасан, муқаддас Ватан!» номидаги республика кўрик-танловида муносиб қат-нашди.
Ёш мусиқачилар анъанавий хонандачилик йўналишида муваффақият қозониб, III даражали диплом билан тақдирланишди. Бу ютуқда ёш санъаткорлардан М. Сотиволдиев, С. Исмоилов, О. Тожибоева, А.Шарифбоеваларнинг ҳиссалари катта бўлди.
Апрель ойининг бошларида Польша Республикасининг Бидгаш шаҳрида Шарқ якка курашининг Шотокан каратэ-До тури бўйича жаҳон чемпионати бўлиб ўтди. Ушбу мусобақада Ўзбе-кистон терма жамоаси таркибида туманимиздаги 10-мактабнинг 9-синф ўқувчиси Абдужаббор Ҳакимов ҳам муносиб қатнашиб, 1 та олтин, 1 та кумуш ва 2 та бронза медалларини қўлга киритди.
Мустақиллик йилларида юртимизда ёшларнинг спорт билан мунтазам шуғулланиши учун барча зарур шароитлар яратил- моқда.
Барпо этилаётган чиройли ва мустаҳкам спорт иншоотлари, мажмуалари, ўсмирлар ва ёшлар ўртасида изчил уюштирилаётган мусобақалар истеъдодли фарзандларимизнинг спорт оламидаги ютуқларига парвоз майдони бўлиб хизмат қилмоқда.
Мозийга бир назар
Фойдали ҳаволалар
