Ўзбекистон Республикасининг Конституциясида ҳар ким қариганда, боқувчисини йўқотганда ижтимоий таъминот олишга хақли эканлиги белгиланган. Бу ҳуқуқни таъминлаш борасида қабул қилинган "Фуқароларнинг давлат пенсия таъминоти тўғрисида"ги қонунда пенсия таъминоти борасида фуқароларга  қатор  имтиёзлар белгиланган. Чунончи, зарарли шароитларда ишловчи  фуқаролар умумбелгиланган пенсияга чиқиш ёшидан 5-10 йил олдин, айрим касбларда ишловчи фуқаролар ёшидан қатъи назар, муайян иш стажига эга бўлганларида  пенсияга чиқишлари мумкин, шунингдек, уруш ногиронлари, болаликдан ногирон фарзандларнинг оналари, лилипудлар ва паканалар ҳам имтиёзли шартларда пенсияга чиқишлари мумкинлиги белгиланган.

Иккинчи жаҳон уруши қатнашчиларига, фронт ортида ишлаганларга, Чернобиль АЭС ҳалокати оқибатида зиён кўрганларга, 1-гуруҳ кўзи ожиз ногиронларга уй-жой коммунал хизматлари ҳақини тўлаш учун компенсация берилади.

Қонун жамият ривожи билан ўзгариб, пенсионерлар учун имтиёз ва енгилликлар кўлами кенгайтириб борилмоқда. Қонунга киритилган кейинги ўзгартиришлар билан 20 йил иш стажига эга бўлган аёллар 54 ёшдан пенсияга чиқишга хақли бўлдилар, пенсионерлар Тошкент метрополитенидан соат 10 дан 16 гача бепул фойдаланишлари мумкин, кам пенсия олувчилар, боқувчисини йўқотганлик пенсияси олувчи боқимандаларга ҳар ойда 50 минг сўмдан "нон пули" берилмоқда. 2001 йилда  ишловчи пенсионерларга пенсиялар иш жойларидан 50 фоиз миқдорда тўланиши жорий этилган эди,  2019 йил 1 январдан бу тартиб бекор қилиниб, барча ишловчи пенсионерларга пенсиялар тўлиқ тўланадиган бўлди. Бироқ, пенсияларни  иш жойларидан тўлаш тартиби сақлаб қолдирилган эди. Бунинг учун эса пенсионер ишлайдиган корхона-ташкилот бухгалтерияси пенсия жам-ғармасидан маблағ олиш учун ҳужжат тақдим этар, маблағ банк орқали корхона ҳисобига туширилар, сўнг банкдан олиниб, тўлов ҳужжати расмийлаштирилар ва ҳисоботи пенсия жамғармасига топширилар эди. Боз устига, ишловчи пенсионер пенсиясини бошқа  пенсионерлардан 1 ой кечикиб олишга мажбур эди. Шу боис ишловчи пенсионерларда ҳақли эътирозлар  туғилаёт-    ганди.

Халқни рози қилишни мақсад қилган муҳтарам Президентимизнинг 2020 йил 24 апрелдаги тегишли фармонлари билан жорий йилнинг 1 майидан бошлаб барча ишловчи пенсионерларга пенсиялар Пенсия жамғармалари томонидан ой бошида пластик карталарига ўтказиб бериш йўли билан тўлаш жорий этилди. Банкларга эса зарур пул маблағларини нақдлаштириб беришни таъминлаш ҳақида топшириқ берилди.

Фармон талаби бажарилишини таъминлаш борасида туманимиздаги 650 нафар ишловчи пенсионерларнинг жорий йил  апрель ва май ойи учун пенсиялари ўз вақтида туман Халқ банкига ўтказиб берилди ва улар тарқатилиши назоратга олинди.

Н. Ғайбуллаева,

Бюджетдан ташқари Пенсия жамғармаси

туман бўлими бошлиғи.