Ватанимиз мустақиллигининг 26 йиллик байрами арафасида туманимизнинг Гўрмирон қишлоғида янгиланган лойиҳалар асосида барпо этилган замонавий уй-жойларнинг дастлабкилари фойдаланишга топширилди.
Энг улуғ, энг азиз байрам – Мустақиллик куни арафасида фойдаланишга топширилган, барча қулайликларга эга дастлабки 3 хонали 2 та уй Президент совғаси сифатида эҳтиёжманд, жисмоний имконияти чекланган фуқароларга насиб этди.
-Қувончим чексиз. Қутлуғ кунлар арафасида уй-жойли бўлганимдан чексиз бахтиёрман. Давлатимизга, Президентимизга минг-минг раҳмат. Бундай замонавий, барча қулайликларга эга уй-жойнинг бошланғич бадали Президентимиз томонидан тўлаб берилди. Янги уйда ишимиз янада самарали бўлади. Чунки айни пайтда касаначилик асосида этак тикаяпман,-дейди Инобат Юлчибоева.
Яна бир фуқаро Юлдузхон Дониёрова учун ҳам бу кун ҳаётидаги унутилмас кун бўлиб қолишини таъкидлаб, «Бундай уй-жойни орзу қилардим. Мана, давлатимиз, Президентимиз ғамхўрлиги сабабли бу орзум амалга ошди. Бағрикенг, саховатли юрт фуқароси эканлигимдан чексиз фахрланаман», деди қалби ҳис-ҳаяжон, қувончга тўла Юлдузхон.
Уй эгаларига калитларни топшириш маросимида вилоят ҳокими, Олий Мажлис Сенати аъзоси Ҳ. Бозоров, вилоят ҳокимининг ўринбосари, хотин-қизлар қўмитаси раиси Ҳ. Юсупова, туман ҳокими в.б. Ж. Юлдашев янги уй соҳибларини қутлаб, ушбу фуқароларга уй калити, Президент совғаси сифатида уйнинг бошланғич бадали тўлангани тўғрисидаги сертификатларни топширишди.