Наврўзи айёмни кўтаринки кайфият билан нишонлаган туман аҳли яна бир қувончли воқеа шоҳиди бўлди - «Булоқбоши» насос станцияси қайта қурилиб, фойдаланишга топширилди. Шу муносабат билан бўлиб ўтган тантанали маросимда иштирок этган вилоят ҳокими, Олий Мажлис Сенати аъзоси Хайрулло Бозоров барчани Наврўз байрами билан қутлаб, янги насос станцияси ишга туширилиши косонсойликларнинг азалий орзу умидлари ушалганини таъкидлади.

-Республикамиз Президентининг 2009 йил 10 августдаги «Фарғона ва Зарафшон водийларида сув ресурсларини бош-қариш лойиҳасини амалга ошириш билан боғлиқ чора-тадбирлар тўғрисида»ги 1172-сонли ва 2012 йил 12 июлдаги «Фарғона ва Зарафшон водийларида сув ресурсларини бошқариш лойиҳасини амалга ошириш билан боғлиқ қўшимча чора-тадбирлар тўғрисида»ги 1786-сонли қарорларига мувофиқ 1975 йилда қурилиб, 40 йилдан ортиқ хизмат қилган ва шу вақт ичида ҳам жисман, ҳам маънан эскирган «Булоқбоши» насос станцияси ҳам қайта реконструкция қилинадиган бўлди,-дея таъкидлади вилоят ҳокими. – Осиё Тараққиёт банки иштирокидаги бу йирик иншоотга республика Қишлоқ ва сув хўжалиги вазирлиги буюртмачи, «Кубота-Ортекс» Япония-Буюк Британия қўшма консорциуми бош пудратчи этиб тайинланди. Уч йил давомида ўнлаб қурилиш-монтаж ташкилотлари иштирок этган иншоотда 11 миллион 931 минг АҚШ доллари миқдорида маблағ сарфланди.

Саккизта насос агрегатлари ўрнатилган насос станциясига Япониядан насос агрегатлари, Жанубий Кореядан электр двигателлар ва Ҳиндистондан электр ва гидрожиҳозлар олиб келиниб, ўрнатилди. Умумий узунлиги 16,9 километр бўлган бешта канал реконструкция қилинди. Секундига бор-йўғи 6 куб метр сув чиқариш ҳолатига келиб қолган насос станциясининг қуввати бугунги кунда 13,2 куб метрга етказилди. Насос станцияси 48 метр баландликка сув кўтариб беради ва беш минг гектар майдонни бир маромда сув ресурслари билан таъминлаш имконини яратади. Яна бир муҳим жиҳат: бу ерда ишловчилар учун барча шарт-шароитлар яратилди, илгаригидай муҳандис-техниклар қора мойга ботиб ишлашмайди, барча операциялар пульт орқали бошқарилади.

Вилоят ҳокимининг таъкидлашича, юқоридаги қарорлар ижроси доирасида Уйчи туманидаги «Қизил равот-2» насос станцияси қурилиши ҳам жадал олиб борилмоқда. 14,3 миллион АҚШ доллари миқдорида чет эл ин-вестиция маблағлари йўналтирилган мазкур иншоот қурилиши шу йилнинг охирида ниҳоясига етказилади.

Қўқимбой қишлоқ фуқаролар йиғинига қарашли Булоқ қишлоғида қайтадан ҳаёт бағишланган насос станциясининг фойдаланишга топширилишига бағишланган тантанада республика қишлоқ ва сув хўжалиги вазирининг ўринбосари Шавкат Ҳамроев иштирок этди ва сўзга чиқиб, бундай иншоотлар вилоятнинг бошқа бир қатор туманларида ҳам барпо этилиши, умуман наманганликлар сув муаммосидан яқин йиллар ичида батамом холи бўлишларини таъкидлади.

Маросимда туман нуронийлари номидан сўзга чиққан Усмонхон ота Валиев кўрсатилаётган юксак эътибор учун республикамиз Президенти ва ҳукуматимизга чексиз миннатдорчилик билдирди.

Маросим сўнггида насос станцияси реконструкциясида фаол иштирок этган бир гуруҳ қурувчи-монтажчиларга фахрий ёрлиқлар ва эсдалик совғалари топширилди.

М.Сулаймонов.

Р.мамадалиев олган сурат.