Республикамиз иқтисодиётида қишлоқ хўжалиги алоҳида ўрин тутади. Айниқса, пахтачилик, ғаллачилик ва пиллачиликдан олинаётган даромадларнинг мамлакатимиз бюджетини шакллантиришда аҳамияти катта. Шу боис мазкур тармоқларни тараққий топтиришга, амалиётда замонавий технологияларни қўллашга ҳамда давлат томонидан субсиядиялар ажратишга эътибор кучайтирилмоқда. Бунга жавобан пахтакор, ғаллакор ва пиллакорларимиз юқори ҳосилдорликка эришиш йўлида астойдил ҳаракат қилмоқдалар.
Баҳорнинг қизғин паллаларида туманимизда ҳам чигит экишга барвақт киришилди. Жорий йилда 3 минг 806 гектар ерда 12 минг тонна пахта етиштиришга аҳд қилган азаматлар ҳозиргача уруғликнинг асосий қисмини ерга қадаб бўлдилар. Эътиборлиси, бу йил Хитойдан келтирилган янги навлар ҳам синов тариқасида 320 гектар майдонга экилмоқда.
- Мазкур навнинг ўзига хос томонларидан бири, у юқори ҳосилдорликка эга. Яъни ҳар гектаридан 50 центнердан пахта олиш мумкин, - дейди туман ҳокимининг қишлоқ ва сув хўжалиги масалалари бўйича ўринбосари Одилжон Ҳошимов. - Қолаверса, янги нав зараркунандаларга бардошлилиги билан ҳам эътиборга тушган.
Ҳа, деҳқон учун энг долзарб палла бошланди - ерга барака уруғини қадашга киришилди. Мавжуд техникалардан унумли фойдаланиб, экишни ўз вақтида ва сифатли якунлаш жуда муҳим. Зеро эрта эккан - эрта йиғади. Шу нақлга муносиб равишда ишни эрта тонгдан бошлашда эса ҳикмат катта. Фермерларимиз яхши ният билан мана шу тартибда далага чиқмоқдалар. Техникалар бир маромда ишлаяпти, хўжалик аъзолари астойдил тер тўкмоқдалар.
Мавсум аввалида вилоят ҳокими Шавкатжон Абдураззақов иштирокида туманимизда семинар ҳам ташкилланди. Унда фермерларга вилоятдан келган мутахассислар керакли тавсияларни бердилар. Ишчи гуруҳ туманимиздаги далаларда бўлиб, яратилган шароитлар билан танишдилар. Камчиликларни бартараф этиш юзасидан йўл-йўриқлар кўрсатилди. Ўрганиш якунлари бўйича муҳокама ўтказган вилоят раҳбари ишни отряд усулида ташкил этиш, техникалар кучидан самарали фойдаланиш, жараён иштирокчиларига етарли шароит яратиш борасида масъулларга топшириқлар берди.
Туманимизда ҳар йили қишлоқ хўжалигининг барча йўналишларида, жумладан пахтачиликда ҳам вилоятда олдингилар сафида режа бажарилади. Ўтган йилда 12 минг 889 тонна пахта олиб, маррага барвақт етиб келган пахтакорлар бу йил ҳам юқори ҳосилдорликка эришиш ва "оқ олтин"дан юксак хирмон кўтариб, вилоятда энг олдингилар қаторида йиллик шартномавий режани уддалашга аҳд қилишган.
Бугун далаларда кўм-кўк тусга кирган ғалла экини парваришини ҳам кучайтириш талаб этилади. Майдонларни ўғитлаш, бегона ўт ва зараркунандаларга қарши препаратлардан оқилона фойдаланиш яхши натижа беради. Чунки иссиқ кунлар бошланиши билан турли ҳашаротлар юзага чиқади. Жорий йил 6 минг 145 гектар ерда мўл ҳосил олишни кўзда тутган ғаллакорларимиз ҳар бир агротехник тадбирни ўз вақтида адо этишга интилмоқдалар.
- Ғаллани иккинчи марта ўғитлаш ниҳоясига етай деб қолди. Бунда органик ўғитлар билан бирга, маҳаллий ўғитлардан ҳам унумли фойдаланилмоқда. Шунингдек, зараркунандаларга қарши кураш чоралари ҳам кўриляпти, - дейди О. Ҳошимов.
Баҳорнинг бир куни йилга татийди. Ҳосил тақдирини шу кунлардаги агротехник тадбирлар ҳал қилишини эътибордан четда қолдирмаган фермерларимиз мавсумга жиддий киришганлар. Айниқса, "Ободон саховати", "Қоратоғ оқ олтини", "Шижоат - жаннат", "Қўқимбой хосияти" сингари фермер хўжаликларида барча юмушлар тартибли ташкил этилган.
Қишлоқ хўжалигининг асосий тармоқларидан бири ҳисобланган пиллачиликка ҳам айни пайт-да эътибор кучайтирилган. Жорий йил туманимизда 3 минг 247 қути ипак қурти парваришланиб, 209 тонна пилла етиштириш режалаштирилган.
Долзарб мавсум олдидан анжуман ташкилланди. Бу йил республикамиз бўйича 2 миллион нафар хотин-қизларни ипак қурти парваришлашга жалб этиш орқали улар бандлигини таъминлаш кўзда тутилаётгани таъкидланиб, бу борада туманимизда ҳам кенг кўламли ишлар амалга оширилиши айтилди.
Туман ҳокими Дилмурод Қодиров пилла етиштирувчиларга бу мўъжизакор жониворни парваришлаш ва саноат учун муҳим ҳисобланган хом ашё олишга жиддий ёндашиш кераклигини таъкидлади. Катта меҳнат эвазига яратиладиган "кумуш тола"ни етиштириш ва уни уюшқоқликда йиғиштириб олишда Яратганнинг ўзи мададкор бўлишини тилаб, дуои фотиҳа қилинди.
Ҳа, айни пайтда қишлоқ хўжалигида ҳар қачонгидан иш қизғин. Ҳадемай, бугунги қилинаётган ҳаракатлар бирин-кетин самарасини бера бошлайди. Дастлаб қишлоқ хўжалигининг ҳандалаги ҳисобланган пилла етиштиришда, сўнг ғаллачиликда натижалар қайд қилинади. Кузда эса энг муҳим тармоқлардан бири бўлган пахтачиликда уйилажак хирмон бўй кўрсатади. Истардикки, буларнинг барида қалбимиздаги яхши ниятларимиз ҳамиша ҳамроҳ бўлсин. Мўл ҳосил ва юқори даражадаги муваффақиятлар барчамизга насиб этсин!
А. ОЛИМОВ,
М. МИРЗОКИРОВ.
