Президентимизнинг тиббиёт соҳасини бутунлай янги босқичга олиб чиқишга оид Фармони ва у билан тасдиқланган Концепция баралла айтишимиз мумкинки, соғлиқни сақлаш тизимида туб ўзгаришларга асос бўладиган тарихий аҳамиятга молик ҳужжатдир. Шу ўринда тан олишимиз керакки, соҳада муайян натижаларга эришган бўлсак-да, унда халқимизни рози қиладиган даражада шарт-шароит ва имкониятлар йўқ эди.
Давлатимиз раҳбари томонидан қабул қилинган ҳужжатларда тўпланиб қолган муаммоларни тизимли ҳал этиш, тиббиёт тизимини комплекс ҳолда тамомила янги сифат босқичига кўтариш йўллари очиқ-ойдин белгилангани билан ғоят аҳамиятлидир.
Президентимиз Фармони билан тасдиқланган 2019 - 2025 йилларда Ўзбекистон Республикаси соғлиқни сақлаш тизимини ривожлантириш Концепцияси мазмун-моҳияти жиҳатидан муҳим дастур ҳисобланади. Унда учта асосий мақсад яққол кўринади: биринчиси, аҳолининг ўртача умр кўриш давомийлигини узайтириш.
Бунинг учун касалликларнинг олдини олиш, профилактика ишларини янада кучайтириш ва одамларга юқори малакали тиббий ёрдам кўрсатишни жорий этиш; иккинчиси, соғлиқни сақлаш тизимини молиялаштириш механизмини тубдан такомиллаштириш; учинчиси, Соғлиқни сақлаш вазирлиги ва унинг ҳудудий бўлимларида бошқарувнинг илғор механизмларини жорий этиш, жумладан "клестер" моделини шакллантириш. Концепцияда бу мақсадларга эришиш учун амалга оширилиши лозим бўлган қатор чора-тадбирлар белгилаб берилган. Хусусан, соҳанинг қонунчилик базаси янада мустаҳкамланади. 2019 йил 1 апрелдан бошлаб республиканинг айрим туманларида тиббий муассасаларни "Ҳар бир даволанган ҳолат" учун клиник харажат гуруҳлари бўйича киши бошига молиялаштириш тизими эксперимент тартибида жорий этилади. Ушбу механизмлар 2020 йил 1 апрелдан эътиборан республиканинг барча ҳудудида босқичма-бос-қич татбиқ қилинишга мўлжалланган. Айрим даволаш - профилактика муассасалари ишлаб чиқилган инвестиция лойиҳалари асосида белгиланган тартибда инвесторларга ишончли бошқарувга берилади. 2021 йил 1 январдан бошлаб Ўзбекистон Республикасида мажбурий тиббий суғурталаш босқичма-бос-қич жорий этилади.
Президентимиз ташаббуси билан халқнинг розилигига эришиш йўлида олиб борилаётган оламшумул ишларни амалга ошириш учун бутун куч ва имкониятларимизни ишга соламиз.
О.Қосимов, туман тиббиёт бирлашмаси бошлиғи, туман Кенгаши депутати.
