Ўткир респиратор-грипп кишилар учун шунчаки ўткинчи бўлиб кўринсада, аслида оғир кечувчи, ёмон асоратлар қолдирадиган хасталик ҳисобланади. Гриппнинг даҳшати шундаки, у майда капилярларни ёриб ташлаб, қон оқишини тезлаштиради. Нафас етишмовчилигини юзага келтиради. Вируслари  қонда кўпайгач жигар, буйрак фаолиятини ишдан чиқаради. Касаллик шиддат билан бошланиб, унинг клиник аломатлари рўёбга чиққунга қадар ўрта ҳисобда 2-3 кун вақт ўтади. Шу вақт ичида грипп вирус заррачалари бурун қаватларига ўрнашиб кўпая бошлайди ва таъсир кучини кўрсатади.

Одам бирдан титраб қақшай бошлайди, боши оғрийди, кўзи ачийди, тана ҳарорати 39-40 даражага кўтарилади. Бу аломатлар гриппдан далолатдир.

Ўткир респиратор касаллигида бурундан сув оқади, эт увишади, тез-тез аксириш кузатилади. Тана ҳарорати 37,2-37,4 даражага кўтарилади. Ҳар икки тур касалликда даволаш мароми ҳар хил бўлади. Масалан, гриппни аспирин билан даволаб бўлмайди.

Бу пайтда унинг ўрнига даво профилактикаси учун «Фемонтадин» таблеткасидан фойдаланамиз. Тана ҳарорати 39-41 даражага кўтарилганда иложи борича уни бўғилтирмасликка ҳаракат қилишимиз керак. Сунъий равишда ташқаридан ҳар хил антибиотиклар ёрдамида тана ҳароратини  туширсак, организмни вирусга нисбатан ҳимоя кучини камайтирган бўламиз. Бунда грипп беморни енгиши мумкин. Агар биз тана ҳароратини сунъий равишда туширмай, маълум вақт ичида ушлаб туролсак ютуқ бизники. Грипп-ўткир респиратор хасталикларига чалинган беморлар 5-6 кун кўрпа тўшак қилиб ётишлари керак. Бемор ётган хона ҳавосини 2-3 соатда янгилаб туриш тавсия этилади. Исириқ тутунидан фойдаланиш ҳам яхши самара беради.

 А.Акрамова, врач-терапевт.