Ботулизм касаллиги микроби кислородсиз муҳитдаги озиқ-овқат маҳсулотларида кўпаяди. Унинг микроблари асосан помидор, бодринг, патиссон, бақлажон икралари каби консерва маҳсулотларида пайдо бўлиб, уни истеъмол қилган киши касалланади.

Ботулизмга чалинган кишининг кўнгли айнийди, у қайд қилади, ҳолсизланади, кўзи хиралашади, жисмлар кўзига иккита бўлиб кўринади, тана ҳарорати кўтарилади, ютиш ва гапириш кобилияти пасаяди, қорин соҳасида оғриқ пайдо бўлади. Бундан ташқари бўйин ва оёқ мушаклари заифлашади. Шунинг учун касаллик аломатлари сезилган заҳотиёқ шифокорга мурожаат қилиш зарур.

Касалликнинг олдини олиш, унга чалинмаслик учун кўча-кўйда ва турли савдо расталаридан ёрлиқлари бўлмаган, ишлаб чиқарилган жойи, санаси номаълум, сифати ва хавфсизлигига кафолат берувчи ҳужжати (сертификати) бўлмаган маҳсулотларни харид қилмаслик керак.

Консерва банкасининг қопқоғи шишган, зич бекилмаган, таркибий тиниқлиги бузилган ва бошқа кўрсаткичларидан бирортаси сизга шубҳали туюлса, бунда маҳсулотни истеъмол қилмаслик лозим.

Ўзингизда ҳолсизланиш, сўзлашувнинг, кўриш қобилиятининг бузилиши, нафас олишнинг қийинлашуви, ҳаракатланишда ўзгаришлар каби белгилар сезсангиз дарҳол шифокорга мурожаат қилинг.

А.ҚОСИМОВА, «саломатлик» маркази директори,

Б. Раҳимбоев, туман ДСЭНМ санитария врачи.