Ич кетиш (диарея) кўпроқ болаларда учрайди. Ичнинг узоқ вақт, тез-тез ва суюқ кетиши оқибатида бола танаси кўп миқдорда суюқлик йўқотади. Сувсизланиш оқибатида боланинг танаси «қуриб» боради. Қон айланиши ҳамда тана аъзолари, айниқса, юрак ва мия фаолиятлари бузилади. Шунинг учун болани ичи кетса, кўнгли айниса зудлик билан шифокорга мурожаат этинг.

Йўқотилган суюқлик ўрнини қоплаш учун беморга кўпроқ суюқлик ичириш зарур. Бунинг учун регидрон эритмаси, агар у бўлмаса, оддий қайнатилган сув, гурунч қайнатмаси ёки кўк чой бериш мумкин.

Регидрон эритмасини тайёрлаш учун қуйидаги кўрсатмаларга риоя қилинг:

Бир пакет регидрон кукунини тоза идишга солинг, унга бир литр тоза, қайнатиб, совитилган сув қўшинг, кукун эригунча яхшилаб аралаштиринг. Агарда уй шароитида регидрон кукуни йўқ бўлса, 1 литр қайнатиб совитилган сувга 1 чой қошиқ туз ва 5 чой қошиқ шакар солиб эритма тайёрланади. Эритмани оғзи беркитиладиган идишда, салқин  жойда сақланг.

Эритмани ҳар 3-5 дақиқада чой қошиқда ичириб туринг. Ичи кетаётган болага турли хил газланган ичимликлар бериш мумкин эмас. Ич кетиш оқибатида бемор суюқлик билан бирга зарур фойдали озиқ моддаларни ҳам йўқотади. Шунинг учун болани тўғри овқатлантириш ниҳоятда муҳимдир. Тўғри танлаб едирилган таом ич кетишини тўхтатишга ёрдам беради. Таомлар қайнатиб пиширилган ва юмшоқ, эзилган (пюре) ҳолда берилса, мақсадга мувофиқ бўлади. Таомни оз-оздан, тез-тез едириш лозим.

Ичи кетаётган болага қовурилган, дудланган таомлар, ширинликлар мутлақо берманг.

 Н. Бобоев, туман ДСЭНМ эпидемиологи,

Н.Алимова, туман болалар поликлиникаси мудири