Жаҳон соғлиқни сақлаш ташкилоти экспертларининг маълум қилишича, ўтган асрда тамаки тутунидан келиб чиққан касалликлар туфайли 100 миллиондан ортиқ киши ҳаётдан кўз юмган. Аҳвол шу тарзда давом этса, ХХI  асрда  бу заҳри қотил миллиардлаб одамларнинг жонига зомин бўлиши башорат қилинмоқда. Ўйлаб кўринг, ана шу миллиардларнинг бири СИЗ бўлишингиз ҳам мумкин-ми, агарда чекаётган бўлсангиз?

Аслида сигарета чекиш соғлиқ учун зарарли эканлигини жуда яхши биламиз, биламиз-у...

Қиш кунларининг бирида бир бемор онахонни кўргани бордик. Оила аъзолари бир хонада ўтиришар, ёши улуғ онахон ҳам, бешикда ётган чақалоқ ҳам сигарета ҳиди анқиб турган ҳаводан нафас олишарди.

Хонтахта устидаги кулдонда эса сигарета қолдиқлари кулга беланиб турарди. Бу хунук манзарадан рўзғорбошининг тез-тез, яъни кўп чекишини тахмин қилиш қийин эмасди. Ахир, сигаретанинг заҳри чекувчидан кўра унинг ёнидагиларга кўпроқ таъсир этиши ҳақида ҳам кўп айтишади-ку.

-Хўжайинингиз кўп чекаркан-да?-сўради ҳамроҳим кулдонни йиғиштираётган бекадан.

-Ҳавас учун чекишни бошлаганлар. Энди ташлай олмай ғирт чекувчи бўлиб қолдилар,-дейди у куйиниб.-Минг марта айтаман, «Ташлай олмасам нима қилай, ҳаракат қиляпман, бўлмаяпти», деб қутуладилар.

Қизиқ. Ҳавас ҳам ҳар хил бўлар экан-да? Оғиз-бурнидан паға-паға тутун чиқариб, ёқимсиз ҳид тарқатаётганларга тақлид қилиш... Энг ачинарлиси, соғлиғини кемираётган тамакидан воз кечиш учун наҳотки, иродаси етмас. Кўча бўйига кичик хонтахтага қўйилган сақич, писта, сигарета каби майда-чуйда буюмлар билан савдо қилувчи она-болага ҳар гал кўзим тушганда беихтиёр, вояга етмаган боласининг тақдири нима бўларкин, деган фикр келади хаёлимга. Харидорларга заҳри қотилни пуллаётган она эртага фарзандининг ҳам  ундан «татиб» кўришини ва ўрганиб қолиши мумкинлигидан наҳот ташвишланмаса. Балки,  қутидаги «Чекманг, соғлиқ учун зарарли!» деган ёзувга ҳар куни юз марталаб кўзи тушар. Бироқ...

Бу мавзуда юзлаб, балки минглаб мақолалар ёзилгандир. Ҳамон мутахассис олимлар, тиббиётчилар илмий асосланган фикрларни билдиришяпти. Афсуски, уларнинг сони камаймаяпти.

Чекишни ташлашга ҳаракат қилиб кўринг, токи ўпкангиз сиздан ўпкаланмасин! Мақсадимиз, фақат яхшилик, Сизни янада огоҳ бўлишга чақириш. Хулосани эса ўзингизга қолдирамиз.