Бруцеллез сурункали кечувчи юқумли касаллик бўлиб, барча қишлоқ хўжалик ҳайвонлари касалланиши ва унинг маҳсулотлари орқали одамга ҳам юқиши мумкин.

Касал ҳайвонларнинг сути, нажаси, сийдиги ва бошқа шиллиқ моддалари билан ифлосланган озуқа, сув, яйлов ва уларни парваришлаш даврида ишлатилган жиҳозлар орқали соғлом ҳайвонга оғиз орқали юқади.

Бруцелланинг уч тури мавжуд. Булар: қорамол бруцелласи, қўй - эчки бруцелласи, чўчқа бруцелласи

Бруцеллалар ташқи муҳит таъсирига чидамли бўлади. Нам тупроқда, сувда 3-4 ойгача, қорамол танасида паст ҳароратда 160 кунгача, қўй териси жунида 1,5-4 ойгача, бринза ва пишлоқда 45 кунгача, ёғда 60 кунгача, совуқда сақланган гўштда 20 кунгача яшай олади.

Бруцелла касаллигининг яширин даври 2-3 ҳафта давом этади.

Ҳайвонларда касалликнинг олдини олишга чорвачиликка ихтисослашган фермер  хўжаликлари раҳбарлари, шахсий мол эгалари ва ветеринария мутахассислари масъулият билан ёндошишлари керак.

Ҳайвонларни бир жойдан иккинчи жойга фақат ветеринария мутахассислари рухсати билан кўчириш талаб этилади. Янги келтирилган молларни 30 кун карантинда сақлаш, бозорлардан сотиб олинган қорамол,     қўй-эчкиларни  текширтириш, қишлоқ хўжалик ҳайвонларини боқишда зооветеринария қоидаларига амал қилиш зарур.

Молни кўрикдан ўтказиш, эмлатиш керак.

 Одамни касалланишдан сақлаш учун тиббий-санитария тадбирларни ўтказиш муҳимдир.

Биринчи навбатда ҳайвон боқувчилари, чорвадорларни касалликка қарши эмлаш талаб этилади.

Қишлоқ хўжалик ҳайвонларини йилига икки марта ветеринария мутахассислари кўригидан ўтказиш зарур.

Қорамол ва қўй-эчкиларда бола ташлаш (ҳомила ташлаш) ҳолатлари, йўлдошни ушланиб қолиши кузатилса дарҳол ветеринария мутахассисларига мурожаат қилинг.

А. Ҳакимов, ветеринария лабораторияси бўлим мудири,

Н. Мирзаев, «Кушон» ветеринария участкаси мудири,

Н. Бобоев, туман ДСЭНМ врачи.