Диарея кўпроқ болаларда учрайди. Ичбуруғ, салмонелёз, ич терлама каби юқумли ошқозон-ичак касалликларининг белгиси ҳисобланади. Ичнинг тез-тез ва суюқ кетиши, бу ҳолатнинг узоқ вақт давом этиши бола ҳаёти учун хавфлидир. Бунинг оқибатида тана сувсизланиб «қуриб» боради. Қон айланиши, юрак ва мия фаолияти бузи-лади.

Агар боланинг ичи тез-тез ва суюқ кетса, кўнгли айниса ёки қусса, нажаси шилимшик-қон, йиринг аралаш бўлса зудлик билан шифокорга мурожаат қилинг.

Шифокор келгунга қадар йўқотилган суюқлик ўрнини қоплаш учун беморга кўпроқ суюқлик-регидрон этитмаси, қайнатилган сув, гурунч қайнатмаси ёки кўк чой беришингиз мумкин.

Бир пакет регидрон порошогини бир литр қайнатилган илиқ сувда эритиб, аралаштирилади. Агар регидрон порошоги бўлмаса, 1 литр қайнатилган сувга 1 чой қошиқ туз ва 5 чой қошиқ шакар солиб эритма тайёрлайсиз. Суюқликни 3-5 дақиқада болага бир қошиқдан тез-тез ичириб туриш лозим. Эритма усти ёпиқ ҳолатда, салқин жойда сақланиши керак. Эритма ҳар куни янги тайёрланиши шарт.

Ичи кетаётган болага турли хил газланган ширин ичимликлар бериш тавсия этилмайди.  Шунинг учун уни тўғри овқатлантириш ниҳоятда муҳимдир. Беморнинг оч қолиши унинг аҳволини оғирлаштиради. Тўғри  танлаб едирилган таом ич кетишини тўхтатишга ёрдам беради. Таомлар қайнатиб пиширилган ва юмшоқ эзилган (пюре) ҳолда оз-оздан тез-тез едирилса, мақсадга мувофиқ бўлади. Беморга қовурилган, дудланган таомлар, ширинликлар бериш мумкин эмас. Озодаликка риоя қилган ҳолда болаларнинг юз-қўлларини тез-тез совунлаб ювиб туриш фойдадан холи эмас.

Н. Бобоев, туман ДСЭНМ эпидемиологи.