Туман тиббиёт бирлашмасининг жарроҳлик бўлимида варикоцелле касаллигига учраган эркак беморларни замонавий жарроҳлик амалиёти йўли билан даволаш изчил йўлга қўйилмоқда.

Хўш, варикоцелле қандай хасталик? Варикоцелле эркак уруғ тизими веналарини кенгайишидир. Касаллик асосан чап ёрғоқдаги вена қон-томирларининг кенгайиши билан кузатилади.

Бу хасталикнинг пайдо бўлишига оғир меҳнат фаолияти билан шуғулланиш, пала-партиш жинсий ҳаёт кечириш, парно фильмларни томоша қилиш кабилар сабаб бўлади.

Варикоцелле касаллигини даволаш чора-тадбирлари кўрилмаса охир-оқибат бепуштликка олиб келади.

Шуни таъкидлаш жоизки, ёш оилаларда вақтида фарзанд дунёга келмаса, кўп ҳолларда айбни аввало, аёлдан қидириб, уни даволаш чора-тадбирлари кўрилади.

Кузатишларимизга қараганда, 30-50 фоиз ҳолатда фарзандсизлик  эркаклар «ҳисса»сига тўғри келмоқда.

Бу муаммо билан мурожаат қилган аксарият бемор эркакнинг кўпчилиги варикоцелле касаллигига чалинганлиги маълум бўлди.

Бу касалликнинг асосий даво чораси жарроҳлик амалиётидир. Бугунги кунда беморлар қисқа вақтда даво топиб, кейинчалик фарзандли бўлиб, оиласи билан ширин ҳаёт кечирмоқда.

Икромхон Саидов, туман тиббиёт бирлашмаси олий тоифали жарроҳи.