Бугун истиқлол туфайли ҳар биримизнинг қалбимизда шукроналик, оилаларимизда осо-йишталик, тинчлик ва хотиржамлик ҳукм  сурмоқда. Мамлакатимиз Президентининг "Ўзбекистон Республикаси давлат мустақиллигининг йигирма етти йиллик байрамига тайёргарлик кўриш ва уни ўтказиш тўғрисида"ги қарорида ҳам шу маънода мамлакатимизда истиқлолни, у билан боғлиқ тарихий сана ва воқеа - ҳодисаларнинг моҳиятини чуқур англаш ва қадрлаш ҳар томонлама муносиб нишонлаш ижтимоий-сиёсий ва маънавий ҳаётимизда муҳим ўрин тутади, деб алоҳида эътироф этилган. Жонажон юртимизда инсонга, айниқса, ёши улуғ қариялар, жисмоний имконияти чекланган, ногиронлиги бор шахсларга ҳурмат-эҳтиром, меҳр-оқибат кўрсатиш маънавий ҳаётимиз ва қадриятларимизнинг ажралмас қисмига айланмоқда.

Мен ҳам ўтган йили уч нафар дугонам қатори Президентимиз, ҳукуматимиз ғамхўрлигидан баҳраманд бўлдим. Бизнинг ҳам яшаш шароитимиз пухта ўрганилиб, уй-жойга муҳтожлигимизни ҳисобга олиб, Гўрмирон массивидан намунали лойиҳа асосида қурилган уй-жойлардан беришди. Бу ғамхўрликдан бошимиз кўкка етди. Президентимизга чин қалбимиздан раҳмат айтамиз.

Бу йил ҳам биз каби ногиронлиги бор, уй-жойга эҳтиёжли 20 нафардан ортиқ шахсга бундай уй-жойлар берилиши, кўпчиликнинг касаначилик асосида иш билан таъминлашга эътибор ошаётганлиги юртимизда инсон манфаати барча нарсадан устун эканлигидан далолатдир.

Ю. Дониёрова, Гўрмирон МФЙ.