Мустақиллигимиз асосчиси Ўзбекистон Республикасининг Биринчи Президенти Ислом Каримов ота-боболаримизнинг асрий орзуларини амалга оширди.

-Халқимизни мустақилликка олиб чиқди. Мустақиллигимизни мустаҳкамлаш, уни кўз қорачиғидек асрашга бутун умрини, борлиғини бахшида қилди, - дейди Ҳотамжон Қорабоев.

-Яқинда бир гуруҳ ҳам-қишлоқлар Самарқанд шаҳрида бўлдик. Ўзбекистон Республикасининг Биринчи Президенти Ислом Каримовнинг қабрини зиёрат қилдик. Юртбошимизнинг сўнмас хотираси қалбимизда мангу яшайди.

-Ёшим юзга яқинлашиб қолди. Умрим давомида бундай халқпарвар, доно ва дов-юрак раҳбарни кўрмаганман, -дейди Дилором ая Умарова. -Дастурхонимиз тўкин. Ҳамма ерда серобчилик. Юртбошимиз раҳнамолигида кўз кўриб қулоқ эшитмаган ишлар амалга оширилди.

Собиқ тузум даврида вайрон бўлган қадамжолар Юрт-бошимиз ташаббуси билан қайта тикланди. Дину диёнатимиз ўзимизга қайтди. Дунёдаги энг қудратли мамлакатлардан бирига айландик. Ана шундай буюк ишлари билан Ислом Каримов ҳаётлигидаёқ ўзига боқий ҳайкал ўрнатган эди.

Йигирма беш йил ичида юртимизда асрларга тенг бунёдкорлик ишлари амалга оширилди. Ватанимизни   тенглар ичида тенг қилиб, элимиз довруғини дунё эътирофига сазовор қилган азиз ва мўътабар инсон Юртбошимиз Ўзбекистон учун жонини фидо қилди.

Ислом Каримов халқимизнинг соябони эди. Халқимизга бош бўлган отамизни сўнгги йўлга кузатаётганда қалбларимиз жудолик азобидан фарёдларга тўлди. Ёшу қарига бирдек ғамхўрлик, меҳрибонлик кўрсатган шу Юртбошимиз эди!

Мамлакатимизда фермерлик ҳаракатига ўтилаётган даврларни яхши эслаймиз. Ўшанда Юрт-бошимиз фермерларга қарата: «Ҳеч нарсадан қўрқмасдан олдинга босаверинглар, ортингизда Президент турибди», деб айтган эдилар. Бугун мамлакатимизда фермерлик ҳаракати кенг қулоч ёзгани, фермерларнинг қишлоқ тараққиётини таъминловчи етакчи кучга айланганида мана шу далда, мана шу даъватнинг ўрнини беқиёс эканлигини ҳаётнинг ўзи тасдиқлаб турибди.

Президентимиз Ислом Каримов 2013 йил 26 апрель куни халқ депутатлари Андижон вилояти Кенгашининг навбатдан ташқари сессиясида Ангрен-Поп йўналишида электрлаштирилган темир йўл қурилиши режалаштирилгани, 2016 йил бу темир йўл қурилиб битказилиши ҳамда поезд қатнови йўлга қўйилишини таъкидлаган эдилар.

Юртбошимиз ваъдаларининг устидан чиқдилар. Улкан довон орқали ўтган йўл қуриб битказилди. Яқинда «Андижон-Тошкент» поезди қатнови йўлга қўйилди. Биз косонсойликлар ҳам бу поездда биринчи бўлиб истиқлолимиз меъмори Ислом Каримовнинг келишини кутган эдик. Юртбошимизга айтадиган кўпдан-кўп дил сўзларимиз бор эди. Юртбошимизга оламшумул ишлари учун, орзуларимиз рўёби учун раҳмат айтмоқчи эдик. Афсус, улар армон бўлиб қолди.

Ислом Каримов ўз хал-қини, ўз навбатида халқимиз ҳам Юртбошимизни чуқур ҳурмат қиларди. Йўлбошчимиз халқимизнинг улкан ишларга қодир эканлигига, халқимиз ҳам Юртбошимизнинг буюк салоҳиятга эга инсон эканлигига юрак-юракдан ишонарди. Юртбошимиз ҳар бир ишда халқимизга қарата: «Мен сизларга суянаман», дерди. Сизу биз ана шу ишончни, албатта, оқлаймиз. Ислом Каримов амалда кўрсатиб берганидек-элим деб, юртим деб ёниб яшаймиз.

Фидокорлик билан меҳнат қиламиз. Президентимиз кўрсатиб берган йўлда ҳамжиҳатлик билан дадил бораверамиз. Сиз қалбимизда абадий яшайсиз, буюк Йўлбошчимиз! Сизнинг доно сўзларингиз биз учун тўғри йўлни кўрсатувчи сўнмас юлдуз бўлади.

Анорбой ОЛИМОВ.

аждодларимизни улуҒлаб

Менга бир воқеани айтиб беришган. Парижда Президент китобининг тақдимоти бўлибди. Юнеско Бош директори Федерико Майор жаноблари бир ёққа учмоғи керак экан, бироқ тақдимотни эшитиб, самолётни тўхтатиб қўйиб, мажлисга келибди-да, қисқа нутқ сўзлабди. У айтибдики, «Мен дунёдаги икки юзга яқин мамлакатни кезиб чиққанман, уларнинг маданий-тарихий ёдгорликлари билан танишганман, лекин ҳеч қаерда Самарқандда бўлганимдаги каби ҳаяжонланмаган эдим. Улуғбек расадхонасида жаноб Президент менга устурлобни кўрсатди. Улуғбеклар, Али Қушчилар қўли теккан бу асбобни қўлга олар эканман, гўё ўзимни XV асрга бориб қолгандек, Улуғбек каби буюк олимлар билан ҳамнафасдай ҳис қилдим. Ҳозирга қадар ҳам ўша ҳаяжон бот-бот вужудимни қамраб олади. Ўшанда жаноб Ислом Каримов Улуғбекнинг «Зижи Кўрагоний» асарини кўрсатди. Мен ҳам Шарқ илмидан хабардорлигимни кўрсатиб қўйиш учун «Жуда зўр асар. Ҳозирги компьютерларнинг таҳлилига кўра Улуғбек юлдузлар ҳаракатини аниқлашда бор-йўғи ярим минутга адашган экан», дедим. Ислом Каримов ялт этиб менга қаради-да, лабларида ним табассум билан жавоб берди: «Йўқ, жаноб Федерико, Улуғбек адашмайди, компьютерларингиз хато қилган бўлиши керак». Бу жавобни эшитиб, жаноб Каримовнинг ўз халқини нечоғлик севишини, ўзбек олимларининг ютуқларидан нечоғлик фахр қилишини яна бир бор ҳис қилдим».

Адабиётшунос олим, моҳир таржимон, Ўзбекистон

Қаҳрамони Озод Шарофиддиновнинг «Йўлбошчи»

сарлавҳали мақоласидан.