Юртимиз мустақилликка эришганига йигирма беш йил тўлди. Бу тарих учун қисқа давр, аммо бугун халқимиз ўзи танлаган йўлда асрга татигулик ютуқларни қўлга киритди.

«Биз тақдиримизни ўз қўлимизга олиб, урф-одатларимизга суяниб, шунинг баробарида тараққиёт топган давлатлар тажрибасини ҳисобга олиб, мана шундай олийжаноб интилишлар билан яшаётганимиз, халқимиз асрлар давомида орзиқиб кутган озод, эркин ва фаровон ҳаётни барпо этаётганимиз, бу йулда эришаётган ютуқларимизни халқаро ҳамжамият тан олгани - бундай имкониятларнинг барчасини айнан шу мустақиллик берганини бугун ҳаммамиз чуқур англаймиз», деб ёзади муҳтарам Юртбошимиз ўзининг «Юксак маънавият-енгилмас куч» асарида.

Энг муҳими, эртанги кунимизнинг таянчи ва суянчи бўлмиш ёш авлодимизнинг янгича, мустақил фикрлайдиган, замонавий билим ва касб-ҳунарларни пухта эгаллаган, шу юртнинг ҳақиқий эгаси, Ватанимизнинг тақдири ва келажаги учун масъулиятни ўз зиммасига олишга қодир инсонлар бўлиб вояга етаётганини алоҳида таъкидлаш зарур.

Мана, куни кеча Бразилиянинг Рио-де Жанейро шаҳрида бўлиб ўтган ёзги Олимпия ўйинларида ёшларимиз кимнинг фарзандлари эканликлари ва биз ҳеч кимдан кам эмаслигимиз, ҳеч қачон кам бўлмаслигимизни амалда исботлаб беришди. Ҳа, Ўзбекистон жаҳонда ўзига хос янгиланишлар жараёнида олға интилмоқда. Бундан-да юксакроқ натижаларга эришишимиз учун барча имкониятлар етарли.

Бугунги оламшумул ютуқларимизни кўролмаётганлар ҳам йўқ эмас, албатта. Лекин Ўзбекистон  ўз халқи озодлиги ва ободлиги йўлида собитқадамлик билан янги чўққиларни забт этажак! Мустақиллигимиз  абадий бўлажак!