Ангрен - Поп электрлаштирилган темир йўли ишга туширилган онларда қалбим чексиз фахр ва ифтихор туйғуларига тўлди. Бундай лаҳзалар ва ҳис-ҳаяжонни ўтган йили Япониянинг Токио шаҳрида ўтказилган XII жаҳон чемпионатида учта олтин медални қўлга куритиб, мутлақ жаҳон чемпиони бўлганимда, бу ютуғим шарафига Ватанимиз байроғи юксакларга кўтарилганда ҳис қилгандим.

Жаҳон амалиётида ноёб лойиҳа бўлган бу улкан иншоотнинг қисқа вақт ичида халқаро талабларга жавоб берадиган тарзда қуриб, фойдаланишга топширилиши дунё аҳлини лол қолдирди. Бу мустақил Ўзбекис-тонимизнинг улкан ютуғи, юксаклик сари яна бир довонни забт этганидан далолатдир.

Муҳтарам Президентимиз ёшлар ҳақида гап кетганда, эртанги кун ёшлар қўлида, ёшлар ҳаракатида, ёшлар илмида, керак бўлса, қудратида, деган гапни доимо уқтириб келадилар. Истиқлол йилларида юртимизда ёшларнинг ҳам маънавий, ҳам жисмоний камолотига алоҳида эътибор қаратилиб, етарли шарт-шароитлар яратилмоқда. Бунинг самараси ўлароқ, ёшларимиз тараққий топган давлатлардаги тенгдошлари билан бемалол рақобатлашишга, беллашишга қодирдир.

Косово, Албания, Япония каби давлатларда ўтказилган жаҳон чемпионатларида Ўзбекистон ёшлари катта зафарларга эришишди, шу жумладан, биргина мен 5 карра жаҳон чемпиони унвонини қўлга киритдим.

Ўз фарзандларининг жисмонан, интеллектуал ва маънавий етук бўлиши олий мақсад билган мамлакат бугунгидай юксак тараққиётга эришаверади.

Мамлакатимиз учун муҳим стратегик аҳамиятга эга бўлган бу каби иншоотларнинг барпо этилиши биз, ёшларни янада юксак чўққиларни эгаллашга чорлайди.

М.Абдумуталов, «Ўзбекистон белгиси» кўкрак нишони совриндори, каратэ бўйича жаҳон чемпиони.