Дейл Карнеги "Осойишта ва бахтли ҳаёт кечириш ҳақида" номли рисоласида шундай ёзади: "...Беҳаловатлилик ҳисси шундай нарсаки, у аёлларнинг ташқи кўринишини жуда тез бузиши ва қаритиши мумкин. Юз - кўз тузилишини ўзгартиради.

Иягининг тортишиши ва юзларини ажин қоплашига сабабчи бўлади. Сочлари оқаради, ҳатто тўкилади. Юз терисининг ранги бузилади. Беҳаловатлилик негизида тишлар ҳам емирилиши мумкин".

I -қоида. Сиз доимо тинчлик, довюраклилик, соғлиқ, умидворлик тўғрисидаги фикр-хаёллар билан тўлиб-тошинг. Чунки "Бизнинг ўй-фикрларимиз қандай бўлса, ҳаётимиз ҳам шундайдир".

II-қоида.Душманларингиз билан "ҳисоблашиб қўйиш"га интилманг. Акс ҳолда уларни ранжитишдан кўра, ўзингизга кўпроқ заҳмат етади. Келинглар, генерал Эйзенхауэрнинг: "Бу ёқтирмайдиган одамлар тўғрисида бир даъфа бўлса ҳам ўйламайлик", деган гапига амал қилайлик.

III -қоида. а) Кимнинг ношукурлигига нисбатан кайфиятимизни бузиб ўтирмай уни одатий ҳол ҳисоблаб қўяверайлик. Исо алайҳиссаломнинг 10 та моховни даволагани улардан фақат биттаси унга миннатдорчилик билдирганини эслаб кўринг. Нега биз кўпдан-кўп миннатдорчилик эшитишга умид боғлашимиз керак экан?

б) Бахтга эришишнинг ягона йўли миннатдорчилик эшитишни ўйламаганимиз ҳолда савоб иш қилиш ва бунинг эвазига бахтга мушарраф бўлмоқлик эканини унутмаслик.

в)Шуни эсдан чиқармангки, фарзандларимиз қалбига миннатдорчилик туйғусини сингдириш сиз билан бизнинг нечоғли таъсир кўрсатишимизга боғлиқдир.

IV-қоида. Ўзингизнинг бахтсизлигингизни эмас, балки ҳузур-ҳаловатларингизни ҳисобга олинг.

V-қоида. Бошқаларга тақлид қилманг, ўзлигингизча қолинг. Зеро, ҳасад - нодонлик, тақлид эса ўз- ўзини ўлдириш демакдир.

VI-қоида. Мабодо тақдир сизга лимон  ҳадя этган бўлса, ундан лимонад тайёрлашга ҳаракат қилинг.

VII-қоида. Ўз хасталигингизни унутиб, бошқаларга озгина бўлса ҳам хурсандчилик бағишлашга ҳаракат қилинг. Сиз бошқаларга яхшилик қилиш билан биринчи галда ўзингизга эзгулик келтирган бўласиз.

Ҳ. Асқарова, 21-мактаб психологи.