Ҳар гал бирор шаҳарга борганимда китоб дўконларига кирмай қайтмайман. Расталардаги китобларнинг ҳаммасини сотиб олсаму ўқиб чиқсам дейман. Китоб дўконларидаги турли касб ва ёшдаги кишиларни кўриб, улар ўртасида бўлаётган суҳбатларни тинглаб, халқимизнинг китобхонлик даражаси юксалаётганига ишонч ҳосил қиламан. Бу ҳолат қалбга қувонч бахш этади.

Бугунгидай техника ва технологиялар тараққий этган замонда китоб унчалик зарурмас, дейдиганлар адашади. Тўғри, Интернет саҳифаларидан ҳар ким хоҳлаган нарсасини, истаган асарини топиши мумкин. Аммо маънавий камолотга элтувчи китобнинг ўрни бўлакча.

Яхши китоб хайрли дўстдир, дейишган ота- боболаримиз. Шундай оилалар борки, фарзандлари билан ўқиган асарларни муҳокамалар қилишади. Ота-она боласи ўқиётган китоблар юзасидан назорат ўрнатишган. Комил инсонлар ана шундай оилаларда етишиб чиқади. Аксинча, ёмон-китоб душмандан баттар. Шунинг учун биз ота-оналар фақат китобхонгина эмас, балки китобни яхши-ёмонга ажрата оладиган илмли бўлишимиз керак. 

Қай биримиз соатлаб маънисиз сериалларни томоша қилаётган оила аъзоларимизга китоб ўқишда ўрнак кўрсата олдик? Қай биримиз узатаётган қизимизга, бошқа боламизнинг туғилган кунида китоб совға қилдик? Ўғлим қувонсин деб, қимматбаҳо телефон олиб берамиз, бироқ ундан фойдаланишини назорат қилмаймиз.

Мактаб, коллежларда китоб байрамлари, севимли адибларимизга бағишлаб адабий кечалар, китобхонликлар, мушоираларни  изчил йўлга қўйишимиз зарур.

Ота-оналар эса давлатимиз томонидан фарзандларимиз учун яратиб берилган шарт-шароитлардан унумли фойдаланиб, уларни одоб-ахлоқли, билимли касб-ҳунарли бўлишларини таъминлашга масъулдирлар.

Бугунги кун фарзанд тарбиясига ҳар қачонгидан ҳам жиддий ёндашишни талаб этмоқда.

Турдихўжа Меҳмонов, «Баҳористон» МФЙ фуқароси.