Жасмина ва Алия 15-мактабнинг аълочи, жамоат ишларида фаол ўқувчиларидан. Жасмина 9, Алия 6-синфда ўқийди. Иккиси ҳам барча фанларни аъло баҳоларга ўқиш билан бирга хорижий тилларни ўрганишга қизи- қади.

Жасмина инглиз, Алия рус тилидан фан олимпиадаларида қатнашиб келади. Ўтган йили Жасмина инглиз тили фанидан олимпиаданинг вилоят босқичида иккинчи ўринни эгаллади. Алия эса билимлар синовида рус тили фанидан туманда биринчи бўлди.

Шуниси эътиборлики, опа-сингилни иккиси ҳам спортчи. Жасмина спортнинг шотакан каратэ-до тури билан шуғулланади. У бир неча марта вилоят, республика миқёсидаги мусобақаларда қатнашиб, "олтин", "кумуш" медаллар соҳиби бўлган. Табиатан нозик бўлган Алиянинг эса бадиий гимнастикада эришган ютуқлари опасиникидан кам эмас. Тошкент, Сурхондарё вилоятларида ўтказилган мусобақаларда совринли ўринларни қўлга киритган. Кўксини 8 та "олтин", 3 та "кумуш" ва 2 та "бронза" медаллари безаб турибди.

- Юртимизда биз, ёшларни жисмоний, интеллектуал ва маънавий етук бўлиб вояга етишимиз учун барча шароитлар яратилган,-дейди Жасмина Абдурасулова. - Бугун Ўзбекистон ёшларини бутун дунё тан олаяпти. Бу бизга ғурур ва ифтихор бағишлайди. Келажакда ўқиш ва спортда юксак марраларга эришиб, юртимиз байроғини юксакларга кўтаришни орзу қиламиз.

Опа-сингилларнинг бу орзулари ижобат бўлишини тилаб қоламиз.

М. Ҳусенова, мактаб амалиётчи психологи.