Ҳозирги кунда юртимизнинг ҳар бир ҳудудида бунёдкорлик ишлари тобора жадаллашиб бормоқда. Табиийки, бу жараёнда уйлар тезроқ битишини хоҳлаймиз, лекин ҳар қандай уй, дўкон ёки оддийгина пойабзал устахонаси қурилишида ҳам меъёрий қоидаларга амал қилиш, ёнғин хавфсизлигини  таъминлашга алоҳида эътибор қаратиш лозимлигини ёдга олавермаймиз. Аслида ўзбошимчалик билан қурилган иморатлар фойдадан кўра зарар келтириши мумкин.

Иморат қурилиши учун, албатта, маҳаллий ҳокимлик ва бошқа тегишли идора ҳамда ташкилотлардан рухсат олиш, ёнғинга қарши оралиқ масофалар қолдириш жуда муҳим. Бундай тартибга амал қилинмаган ҳолда бунёд этилган биноларда ёнғин чиқиш хавфи кучаяди. Биргина мисол, ўзбошимчалик билан қурилган бинолар орасида техникаларнинг бемалол ҳаракатланишига имконият қолмайди.

Бўлимимиз техник ходимлари жорий йилнинг ўтган даврига қадар туман ҳудудида қурилиши кўзда тутилган бинолар учун 33 та ер майдонлари танланишида, 12 та қурилиш лойиҳалари ўрганилишида фаол иштирок этдилар. Мурожаат хатлари асосида жойларга чиқиб, ҳолатлар кенг қамровли кўрилди. Қурилажак объектлар амалдаги шаҳарсозлик меъёрларига қай тарзда мос келиши лойиҳачи ва қурувчи ташкилот ходимлари иштирокида кўздан кечирилди, тегишли таклиф ва тавсиялар берилди. Шунингдек, қурилиш ташкилотлари ишчи-хизматчилари билан ёнғин хавфсизлигини таъминлаш юзасидан тушунтириш ишлари олиб борилмоқда.

Хулоса қилиб айтганда, бирор фалокат юз бермаслиги кўп жиҳатдан фуқароларнинг ўзига, уларнинг тартиб-қоидаларга амал қилиш ёки қилмасликларига боғлиқ. Шу сабабли доимо зийрайликка даъват этамиз. Огоҳ бўлинг, азиз юртдошлар, ёнғин келиб чиқмаслигининг олдини олиш ўз қўлимизда эканлигини бирор дақиқа бўлса-да, эсдан чиқармайлик. Айниқса, қурилиш ишларида талабларга тўлиқ риоя қилиш билан ўзимиз ва оиламизнинг хотиржам ҳаётини таъминлашга ҳисса қўшайлик.

Зуҳриддин АБДУРАҲМОНОВ, туман ФВБ НТБ бошлиғи, капитан.