Бугунги кунда бутун ер юзига тарқалиб кетган Covid-19 коронавируси ўчоғи сифатида тан олинган Хитойнинг Ухан шаҳрида жойлашган Вирусология институти ходимлари муассасанинг ўта хавфли микроорганизмлар тадқиқ этиладиган лабораториясида иш қай тарзда йўлга қўйилгани ҳақида ОАВга сўзлаб беришди.Ухань давлат лабораториясининг биохавфсизлик бўйича директори Юань Чжимин корхонада инфекцион материаллар билан ишлашда барча қоидаларга қатъий риоя қилинишини ишонч билан таъкидлайди. Қайд этилишича, лабораторияда тажриба ўтказувчи мутахассислар ҳар йили жисмоний ва руҳий ҳолати юзасидан текширувдан ўтиб туришади.
Бундан ташқари, лабораторияга кириб-чиқиш мунтазам қайд этиб борилади, бино ҳудудида ёлғиз юриш ман этилган.
Шунингдек, лабораторияда аксил босим технологияси қўлланади: бино ичидаги ҳаво ташқарига чиқмайди.
Таъкидланишича, ҳар қандай зарарланган чиқинди унсурлар юқори босим остида қайта ишловдан ўтказилади ва кейин тегишли лицензияга эга компания томонидан йўқ қилинади.
Маълумки, АҚШ президенти Дональд Трамп коронавируснинг дунё бўйлаб тарқалиб кетишида бир неча бор Хитойни айблаб, баёнот берди. Унинг айтишича, инфекция хитойлик мутахассисларнинг ишга масъулиятсизлиги оқибатида назоратдан чиқиб кетган бўлиши мумкин.
Америка етакчиси Жаҳон соғлиқни сақлаш ташкилоти (ЖССТ)ни ХХР қўлидаги "қўғирчоқ" деб атади. Қўшма Штатлар Давлат котиби Майкл Помпео эса Вашингтон коронавирус Ухандаги лабораториядан тарқатилганини тасдиқловчи жуда кўп далилларга эга эканини эълон қилди.
ЎзА
