Аҳоли турмуш даражаси ва сифатини, унинг моддий фаровонлигини оширишга қаратилган ижтимоий сиёсатни фаол давом эттириш 2017 йил - «Халқ билан мулоқот ва инсон манфаатлари йили»даги энг муҳим стратегик вазифа ва устувор йўналишлардан биридир.

Мустақил юртимизда оналик ва болаликни муҳофаза қилиш, халқимиз, айниқса, нуронийлар, пенсионерларимизнинг соғлом ва мазмунли умр кечиришлари учун зарур шарт-шароитлар яратиб берилмоқда. Бу борада, айниқса, ногиронларни ижтимоий ҳимоя қилиш, соғломлаштириш, тўлақонли ҳаёт кечиришлари учун шароитлар яратишга алоҳида эътибор ва ғамхўрлик кўрсатилмоқда.

Ўзбекистон Республикасининг «Ногиронларни ижтимоий ҳимоя қилиш тўғрисида»ги Қонунининг 3-моддасида: «Ногирон деб, жисмоний, ақлий, руҳий ёки сенсор (сезги) нуқсонлари борлиги туфайли турмуш фаолияти чекланганлиги муносабати билан қонун ҳужжатларида белгиланган тартибда ногирон деб топилган ҳамда ижтимоий ёрдамга ва ҳимояга муҳтож шахс айтилади», деб  белгиланган.

«Фуқароларни тиббий - меҳнат эксперт комиссияларида тиббий кўрикдан ўтказиш тартиби тўғрисидаги Низом»нинг 2-боб, 7-бандига асосан, айнан бир касаллик туфайли вақтинча меҳнатга лаёқатсизлик бошланган кундан бошлаб узлуксиз муддат қаторасига 4 ойдан ортиқни ташкил қиладиган узоқ муддат касал бўлган (силга чалинган беморлардан ташқари) шахслар бошланғич тиббий кўрикдан ўтказилади. Шунингдек, айнан бир касаллик туфайли вақтинча меҳнатга лаёқатсизлик даври вақтинча меҳнатга лаёқатсизлик бошланган кундан эътиборан 12 ой мобайнида танаффус билан бирга 6 ой мобайнида давом этган шахслар, сил касаллиги биринчи марта аниқланган, вақтинча меҳнатга лаёқатсизлик  даври касаллик аниқланган кундан бошлаб камида 10 ойни ташкил қиладиган, шунингдек, асосий касаллик кучайган-вақтинча меҳнатга лаёқатсизлик бошланган кундан эътиборан камида 6 ой силга қарши курашиш муассасаларида ҳисобда турган тақдирда сил касаллигига чалинган беморлар қабул қилинади.

Ногиронлик белгилари аниқ кўриниб турган шахслар, нохуш клиник прогнозли беморлар юқорида кўрсатиб ўтилган муддатлар ўтгунча тиббий кўрикдан ўтказишга қабул қилиниши мумкин. Ушбу шахсларни тиббий кўрикдан ўтказишга қабул қилиш тўғрисидаги қарор ТМЭК раиси томонидан чиқарилади.

Фуқароларни тиббий кўрикдан ўтказиш тартиби, ногиронликни ва касбий меҳнатга лаёқат йўқотилиши даражасини аниқлашга йўналтирилган норматив-ҳуқуқий ҳужжатларни аҳолига тушунтириш, ногиронларни реаблитацияси, муҳтож шахсларни протез-ортопедия буюмлари, реаблитация техник воситалари ва кресло - аравачалар билан таъминлаш масалаларида жойларга кенг кўламли тушунтириш, тарғибот ишлари олиб борилмоқда,

Туман тиббиёт бирлашмаси, мавжуд қишлоқ врачлик пунктларида ТМЭК бурчаклари ташкил этилган ва зарур қўлланмалар билан таъминланган. Мутахассисларимиз жадвал асосида жойларда бўлиб, аҳоли билан яқиндан мулоқот ўтказишмоқда, вақти-вақти билан ётиб қолган бемор ногиронлар ҳол-аҳволидан хабар олиниб, зарур ёрдамлар кўрсатилмоқда.

А. Қамбаров, Ф. Соатов, 52-сонли Чуст

туманлараро ТМЭК врач-экспертлари.