Мамлакатимиз Президентининг жорий йил 5 октябрдаги «Тадбиркорлик фаолиятининг жадал ривожлантиришни таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида»ги Фармони хусусий мулк дахлсизлиги ва ҳимоясини янада такомиллаштириш, тадбиркорлик фаолиятига ноқонуний аралашувлар ва ноқонуний текширувларнинг олдини олиш, кичик бизнес ҳамда хусусий тадбиркорлик субъектлари ҳуқуқларини ҳимоя қилишда муҳим дастуруламал бўлиб хизмат қилади.

Фармонга асосан 2017 йилнинг 1 январидан эътиборан тадбиркорлик субъектлари фаолиятини режадан ташқари текширишларнинг барча турлари, шунингдек, тадбиркорлик субъектлари фаолиятини, шу жумладан, жиноят ишлари доирасидаги муқобил текширишларнинг барча турлари бекор қилинади.

Шуниси эътиборлики, мазкур Фармон маъмурий ва жиноят қонунчилигини либераллаштириш йўлини давом эттириб, молия-хўжалик фаолиятини амалга оширишда биринчи марта ҳуқуқбузарликлар содир этган тадбиркорлик субъектлари ва уларнинг ходимларини ҳамда тадбиркорлик фаолиятини давлат рўйхатидан ўтказмасдан амалга ошираётган шахсларни, улар томонидан етказилган зарарни қоплаган ва ҳуқуқбузилиши оқибатларини белгиланган муддатларда ихтиёрий бартараф этган тақдирда жавобгарликнинг барча турларидан озод қилиш каби тубдан янги чораларни назарда тутади.

Тадбиркорлик субъектларига нисбатан тадбиркорлик фаолиятини амалга ошириш ҳуқуқидан маҳрум қилиш тарзидаги жиноий жазо қўллаш тақиқланган.

Тадбиркорлик субъектларининг ҳуқуқлари ва қонуний манфаатларини ҳимоя қилиш соҳасида қонунлар ижроси устидан Парламент назорати шаклларини янада кучайтиришга қаратилган чора-тадбирлар белгилангани ҳам эътиборга моликдир. Ана шу мақсадда Ўзбекистон Республикаси Олий Мажлиси ҳузурида Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил институтини ташкил этиш мўлжалланмоқда.

Мамлакатимизнинг Биринчи Президенти томонидан белгиланган йўлнинг узвий ва изчиллигини таъминлашга хизмат қиладиган ушбу муҳим ҳужжатнинг мазмун - моҳияти ва аҳамиятини кенг аҳоли қатлами, тадбиркор ва ишбилармонларга етказиш, улар ўртасида тушунтириш ишларини олиб бориш долзарб вазифаларимиздан биридир.

Ана шу мақсадда яқинда Косонсой маиший хизмат касб-ҳунар коллежида ҳудуддаги тадбиркорлар, ёшлар вакиллари иштирокида давра суҳбати ўтказилди.

Тадбиркорлар ва ишбилармонлар ҳаракати - ЎзЛиДеП туман кенгаши, туман ДСИ ҳамкорлигида уюштирилган тадбирда сўзга чиққан партиянинг туман кенгаши раиси Р. Мақсудов, аппарат раҳбари И. Ангуров, туман ДСИ мутахассиси Т. Домлажонов ва бошқалар сўзга чиқиб, слайд орқали Фармоннинг мазмун-моҳияти ҳақида кенг тушунтириш беришди.

М. АКРАМОВ, туман Кенгаши депутати,

ТИҲ-ЎзЛиДеП депутатлар гуруҳи аъзоси.