Инспекциямизга пахта хом - ашёси ва улардан қайта ишланган  маҳсулотларни  қабул  қилувчи  ҳамда сақловчи корхоналарнинг техник  ҳолатини назорат қилиш вазифаси юклатилган. Шунга  кўра,  долзарб мавсум бошланиши олдидан "Наманган пахта текс" МЧЖга қарашли туман пахта тозалаш корхонаси қабул пунктининг тайёргарлиги кўздан кечирилди.

Корхонада мавсумни кўнгилдагидек ўтказиш мақсадида таъмирлаш ва созлаш ишлари амалга оширилган. Ишчи-хизматчилар учун овқатланиш, дам олиш хонаси ва ювиниш хоналари  мавжуд.

Ҳосилни ўлчаш учун мўлжалланган 25 тонналик электрон тарози шай ҳолатга келтирилган ва "Агроонлайн" тизимига уланган. Фермер хўжаликлари билан тузилган 170 та контрактация шартномалари мазкур дастурга киритилган. Шунингдек, 28  та  кузатув  камералари  соз  ҳолатда  ишлаб турибди.

Масканда ёнғин хавфсизлиги қоидаларига риоя этилиши талаб даражасида. Бирор кўнгилсизлик юзага келганда асқотадиган 3 та ҳовуз шай ҳолатда. Ўт ўчириш автомобили техник жиҳатдан созланган. Бошқа жиҳозлар яроқлилиги ҳам таъминланган.

Маълумки, туманимизда бу йил  3 минг 955 гектар пахта майдонидан 11 минг 300 тонна  ҳосилни йиғиб-териб олиш кўзда тутилган. Бунинг учун 91 та отряд тузилган. Теримда фермер хўжаликлари аъзолари билан бир қаторда маҳаллалардаги ишга эҳтиёжманд аҳолидан кўнгиллилар ҳам иштирок этадилар. Бундай қизғин жараёнда эса ҳар бир тадбир белгиланган тартиб-қоидалар асосида ташкил этилиши лозим. Айниқса, катта меҳнат ва харажатлар эвазига етиштирилган "оқ олтин"нинг бирор мисқоли нест-нобуд бўлмаслиги чораларини кўриш талаб этилади. Бунда эса ҳамма ҳушёр ва зийрак фаолият кўрсатиши зарур. 

З. АБДУХАЛИЛОВ, Агросаноат мажмуи устидан назорат қилиш

инспекцияси туман бўлими катта инспектори.